Kolektor sa bangko natulisa'g P17,000
CEBU, Philippines - Laing kolektor sa bangko ang gitulis kagahapon sa alas 10:00 sa buntag didto sa sitio Baogo, barangay Guadalupe, dakbayan sa Carcar.
Ang biktima mao si Adrianne Cuizon, 30, nga taga Poblacion, Carcar ug nagtrabaho isip kolektor sa Katipunan Bank sa maong dakbayan.
Si SPO1 John Paul Milon sa Carcar Police Station mibutyag nga ang biktima lulan sa iyang motorsiklo ug padulong na nga mopauli dihang giatangan siya sa wala hiilhing lalaki kinsa mition kaniya og armas de fuego dayon pahibawo nga tulis.
Sa kabalaka sa iyang kinabuhi gitunol sa biktima ang iyang koleksyon nga mikabat sa P17,000 .
Human madawat ang maong salapi misirit dayon pahilayo sa maong lugar ang tulisan.
Sumala sa kapolisan nga ikaduha na kining maong tulis sa kolektor sa bangko sulod niining semanaha .
Sa miaging Miyerkules, Mayo 16 ang kolektor sa Fair Bank didto sa dakbayan sa Bogo nga si Giovanni Loga , taga barangay Dapdap, lungsod sa San Remigio nakuhaan usab og P17,000 nga koleksyon sa wala hiilhing mga tulisan.
Padayon pang gipangita sa kapolisan ang maong mga tulisan. (BANATNEWS)
- Latest
- Trending
