Morpos milingkod nga OIC sa Station 2

CEBU, Philippines - Milingkod na sugod kagahapon isip officer-in-charge (OIC) sa Police Station 2 sa Mandaue City Police Office (MCPO) si Inspector Ramil Morpos.

Si Morpos nga kanhi deputy chief sa Investigation Detection and Management Bureau (IDMB) sa MCPO ug OIC sa Presinto 2 nga nagbase sa barangay Subangdaku maoy gidistino ni Senior Superintendent Noel Gillamac nga hulip ni Inspector Mark Edward Barrios kinsa girelibohan sa katungdanan.

Kauban ni Barrios sa Presinto 2, nga girelibohan usab mao si SPO1 Herbert Pelayo nga gipasanginlang nangilkil   og P3,000 gikan sa usa ka dinakpang babaye kinsa nasakpang mipayuhot og mini nga P1,000.

Gumikan niini gipaubos sa imbistigasyon si SPO1 Pelayo pinaagi sa buhatan sa IDMB aron kapakanaugan kini og tukma nga lakang.

Sa nasayran usa ka dinakpang babaye ang mipasangil kang SPO1 Pelayo nga nangilkil kaniya og   kuwarta human siya ireklamo sa nagdumala sa usa ka outlet sa lotto kay mini ang P1,000   nga iyang gibayad sa mga tiket sa lotto nga iyang gipalit sa miaging semana. Hinuon human siya makabayad og P3,000 ngadto sa maong polis giingong gibuhian dayon siya niini gikan sa pagkabilanggo sa detention cell sa Presinto 2.

Apan ang maong pasangil lig-ong gipanghimakak ni SPO1 Pelayo ug mibahad   siya nga mopasaka og sumbalik batok sa maong babaye ngadto sa hukmanan.  (BANATNEWS)