Ulitawo gitulis nakuhaa'g P5 mil

CEBU, Philippines - Nawad-an sa iyang P5,000 ug mahalon nga cell phone ang usa ka ulitawo human kini tulisa sa duha ka armadong lalaki didto sa dalan Ouano Avenue sa reclamation area sa barangay Tipolo, dakbayan sa Mandaue alas 6:00 pasado sa miaging gabii.

Ang biktima mao si Kisen Comendador, 21, ulitawo nga lumad nga taga lungsod sa Sogod ug nagtrabaho sa usa ka establisamento sa reclamation area sa maong dakbayan.

Si PO2 Gilbert Igot sa kapolisan sa Presinto 2 sa Mandaue City Police Office (MCPO) nga nahinabi sa Banat News miingon nga gikan pa sa iyang trabaho ang biktima ug nag-atang kini og sakyanan kay mopauli.

Apan nasugatan sa biktima ang duha ka wala hiilhing lalaki kinsa kalit lang milanit sa ilang   armas de fuego dayong tion niini ngadto sa biktima uban sa pagdeklarar nga tulis.

Gipangayo sa mga tulisan ang bag sa biktima nga may sulod nga P5,000 kapin, cell phone ug uban pang mahinungdanong butang.

Human makuha ang bag kalma kaayong mipahilayo sa maong lugar ang mga tulisan.

Sa pagkakaron padayon pang gipangita sa kapolisan ang maong tulisan.  (BANATNEWS)