Tag-iya'g junkshop giwarningan

CEBU, Philippines - Ang mga tag-iya og junkshop sa dakbayan sa Talisay gitigom sa buhatan sa hepe sa kapolisan sa siyudad ug gituki ang paghugpa sa kinawatay sa mga metro sa tubig ug mga kable sa kuryente, telepono ug cable TV sa maong dakbayan.

Si Superintendent Eddie Recamara, hepe sa Talisay City Police Station sa pakighinabi sa Banat News kagahapon mibutyag nga siyay mipatawag sa maong miting niadtong Lunes sa buntag.

Matud niya nga nagpasalamat siya sa tanang mga nanag-iya og junkshop tungod kay cooperative kaayo kini ngadto sa kapolisan.

Sa maong tigum giawhag sa hepe ang mga junkshop owner nga dili mamalit og mga butang nga kinawat sama sa mga metro sa tubig ug mga kable sa telepono ug kuryente ug sa cable TV.

Gawas niini ang mga tag-iya og junkshop gi-edukar usab sa hepe sa posibleng kaso nga ipasaka batok kanila kung mapamatud-ang namalit sila og mga kinawat.

Ang mga tag-iya og junkshop giawhag sa hepe nga motawag dayon sa ilang buhatan kung adunay mga mamaligya o magpatimbang og mga kinawat nga butang sa ilang shop.

Gipasabot ni Recamara nga kun walay mamalit og mga kinawat nga butang mahunong usab ang kinawatay sa dakbayan.  (BANATNEWS)