Mipatay sa ugangan nadakpan

CEBU, Philippines - Nadakpan didto sa barangay Manggako lungsod sa Ginatilan ang construction worker nga suspek sa pagdunggab patay sa iyang ugangan ug niangol sa iyang asawa ug pag-umangkon atol sa bisperas sa piyesta sa sitio Private, barangay Mantalongon sa lungsod sa Dalaguete niadtong Lunes.

Si Rolando Plarisan, 33, minyo, didto madakpi sa balay sa iyang igsoon sa Manggako 

Siya maoy responsabli sa pagdunggab sa iyang asawa nga nalandig sa tambalanan ug sa pag-umangkon niini nga 2 anyos, human niya dunggaba patay   ang amahan sa iyang asawa. Nasayran sa kapolisan nga naghuramentado sa kasuko ang maong suspek tungod kay wala makig-uli ang iyang asawa kaniya human siya buwagi niini gumikan sa iyang pagka -palahubog ug pagkahingulata sa iyang asawa.

Si SPO1 Veronico Centino, Desk Officer sa Dalaguete Police Station mibutyag sa Banat News nga ang ilang hepe nga si P/Insp. Dexter Basiergo maoy nangulo sa pagdakop sa suspek human nila madawat ang impormasyon bahin sa nahimutangan sa suspek.

Matud ni SPO1 Centino nga didto sa maong lugar misuporta usab ang igsoong babaye   sa suspek kanilang mga polis hinungdan nga dali ra kaayo kining naposasan kay nahinanok kini sa pagkatulog sa maong higayon. (BANATNEWS)