13 ka karaang bomba nakawtan

CEBU, Philippines - Mokabat sa 13 ka mga mortar nga gituohang kabilin sa mga Hapon sa ikaduhang gubat sa kalibotan ang nakawtan didto sa barangay Pangdan siyudad sa Naga, sa miaging hapon.

Usa ka Hermilito Aliganga, 35, minyo ug nagpuyo sa maong lugar ang nakadiskobri sa maong karaang bomba samtang nagkawot kini kilid sa iyang balay og puso artesiano.

Si SPO2 Ian Quetayen sa Naga City Police Station mibutyag sa Banat News nga makurat si Aliganga dihang natiltilan niini ang puthaw ilawom sa yuta busa iya kining giayo paghipos. Iyang gisulod sa sako ug gihatod ngadto sa kapolisan nianang pagkagabii.

 Gihulagway ni SPO2 Quetayen nga karaan na kaayo ang maong mga bomba, tayaon na ug dili na mabasa ang mga marka niini.

Ang mga tiguwang nga taga Naga,   maoy nasayud nga ang barangay Pandan   maoy gihimong kampo kaniadto sa mga Hapon atol sa  ikaduhang gubat sa kalibotan.

Matud ni SPO2 Quetayen nga sa pagkakaron gipahiluna ang maong mga bomba sa usa ka lawak nga may aircon sa ilang buhatan sa paglikay nga mamuto unya ang maong mga butang samtang nagpaabot sila nga makuha  kini sa mga sakop sa SWAT. (BANATNEWS)