CEBU, Philippines - Nasikop sa kapolisan sa dakbayan sa Carcar ang ika-duhang suspetsado sa kamatayon ni Carl Vinson Apura didto sa Vifco Piggery sa barangay Valladolid, sa maong dakbayan sa miaging gabii.
Ang nasikop mao si Jethro Lapiña, 23, ulitawo, kinsa nagbantay sa nahisgutang piggery, kinsa usa sa gitumbok sa mga saksi nga kauban ni Lauron niadtong kagabhion nga gipatay nila si Apura.
Samtang si Carcar City Mayor Necipuro Apura dili pa gustong makadungog sa mga estorya sa suspetsadong mipatay sa iyang anak.
Kini dihang ang suspek nga si Jay Boy Lauron giingong nagbasul ug buot nga mangayo’g pasaylo ngadto sa mayor, ang amahan sa biktima nga si Carl Vinson Apura.
“Di pa ko gustong maminaw nianang mga estorya niya” matud pa ni Mayor Apura.
Gibutyag ni Apura nga kun tinuod ang pagpangayo og pasaylo sa suspetsado, angay unta siyang mosulti sa tinuod.
Gipadayag ni Apura nga nasakitan pa siya pag-ayo sa nahitabo sa kamanghoran niyang anak nga giulo pagpusil-patay ni Lauron. Si Apura nagdumili paghatag og dugang pamahayag kalabot sa pagkasikop sa suspetsado samtang anaa pa kini sa pagbangutan sa pagkawala sa iyang anak.
Niadtong Huwebes sa hapon nasikop si Jay Boy Lauron didto sa Barangay Onion, lungsod sa Catigbian Bohol pasado ala 1:00 sa hapon.
Ang biktima gipatay niadtong Mayo 12 atol sa gipahigayong Live Band Concert didto sa Sitio Tubod Barangay Valladolid, Syudad sa Carcar. (BANATNEWS)