Pugante sa Bohol nia sa Cebu

CEBU, Philippines - Tulo ka mga piniriso sa Bohol District Jail sa dakbayan sa Tagbilaran kinsa mga armado, nakapuga niadtong Huwebes sa gabii ug posibling ania sa Cebu.

Ang maong mga pugante mao sila si Mario Ilaya nga may kasong pagpangawat, Bryan Ceniza, illegal possession of firearms, ug Exequil Alviscal, sa kasong pagpatay.

Gipakita sa CCTV camera sa maong prisohan pinaagi sa ABS-CBN TV Patrol Central Visayas kung giunsa pag-ilog sa mga pugante ang mga armas nga .45 kalibre nga pistola ug 9MM gikan kanila ni   JO1 Torion ug JO1 Dungpat, mga jail guard nagbantay   sa prisohan.

Human mailog sa mga pugante ang ilang mga armas, gipamusil sila niini apan  nakalikay sila sa mga bala busa wala sila maigo.

Ang Deputy Jail Warden sa Bohol District Jail mibutyag nga adunay nakasumbong sa ilang opisina nga human sa pag-ikyas sa maong mga piniriso, mi-check-in kini sa usa ka Pension House sa Tagbilaran apan wala na kini hiabti didto sa kapolisan nga mirespondi sa maong pahibawo.

Sukad sa ilang pag-eskapo hangtud karon padayong gipanid-an sa kapolisan ang palibot pinaagi sa pagpahigayon og checkpoint sa nagkalainlaing lugar sa Tagbilaran ug  sa lalawigan sa Bohol.

May katahap usab sila nga nakasakay ang maong mga pugante og pumpboat nga paingon sa Negros Orriental, Maasin, Siquijor, Camiguin, ug Cebu.

Kasamtangang gipakatap karun ang ilang hulagway sa mga airport, terminal ug mga pantalan sa Bohol ug Cebu aron makabantay   ang mga tawo ug makatabang sa kapolisan aron masikop ang maong mga pugante. (WC) (BANATNEWS)