Enforcer gikulata

CEBU, Philippines - Mihuboy ang nawong sa usa ka traffic enforcer sa dakbayan sa Talisay human kini kulataha sa drayber sa traysikol nga iyaha untang sikopon tungod sa kalapasan sa lagda trapiko niadtong Miyerkules sa hapon diha sa sitio Sangi, barangay Tabunok dakbayan sa Talisay. Si Jeffrey Robles, 30, midangop sa Talisay City Police Station ug mireklamo batok sa usa ka Elga Delano, 39, taga barangay San Roque, Talisay, drayber sa traysikol nga nagtangag sa plakang QI-9355. Si Delano nagtingkagol sa Talisay City detention cell human kini masikop sa mga kauban sa biktima ug gitugyan ngadto sa mga polis. Giingong gisikop unta ni Robles si Delano tungod kay mihunong kini sa dapit nga dunay ‘no stopping’ ug nakapahuot sa dalan apan imbes motahod gikulata siya sa suspek. (BANAT NEWS)