"Killer" ni Carl nadakpan na

CEBU, Philippines - Tungod lang sa hagit ang hinungdan sa pagpusil patay sa anak sa mayor sa syudad sa Carcar nga si Carl Vinson Apura niadtong Sabado sa gabii atol sa gihimong live band concert sa sitio Tubod barangay Valladolid.

Si Jayboy Lauron, usa ka construction worker ug kasamtangang nagpuyo sa barangay Carreta ning dakbayan kinsa nadakpan sa kapolisan didto sa Barangay Onion, Catigbi-an, Bohol miangkon sa krimen. Sa pakighinabi ni Lauron sa mga tigbalita mitug-an kini nga atol sa maong live band sa nahisgutang lugar miapil siya sa kalingawan ug gani misayaw pa siya apan kalit silang nagkasumpaki sa biktima ug gihagit siya niini nga magpinusilay sila sa gawas sa koral.

“Iya man ko nga gihagit, miana man siya nga adto ‘ta sa gawas magpinusilay ta,” matud pa ni Lauron kansang pamilya lumad sa maong barangay.

Matud pa ni Lauron nga wala na niya paabota pang manggawas pa sila ug tungod usab sa iyang kahubog gipusil niya gamit ang armas nga naa sa iyang bulsa nga iyang gidala-dala apan gipanag-iya sa iyang amahan. Nianang pagka-Lunes misibat si Lauron patubang sa Bohol. Samtang ang hepe sa Carcar City Police Station Chief Inspector Teodulfo Manatad III uban sa iyang mga sakop miingon nga duna silay nakuhang impormasyon bahin sa suspek nga atoa kini sa Bohol.

Dugang pa ni Manatad nga aduna silay tulo ka saksi nga positibong nagtumbok sa suspek.

Ang hepe sa kapolisan sa lalawigan sa Sugbo, Sr. Supt. Patrocinio Comendador midayeg sa gihimo sa Carcar Police ug mimandong kinahanglang madakpan sad ang kauban ni Lauron.

Si Lauron nanawagan sa mayor sa syudad sa Carcar nga si Mayor Nicepuro Apura ug nangayo og pasaylo tungod kay wala siya masayod nga anak niini ang iyang napatay.

“Mangayo ko’g pasaylo ni Mayor (Apura) kay wala man ko makaila nga iya ‘tong anak,” matud pa ni Lauron.

Sa laing bahin, si Mayor Nicepuro Apura nakurat sa diha nga gitawag kini sa Banat News kalabot sa pagkasikop sa suspetsado sa pagpusil patay sa iyang anak. “Huh?! Nadakpan na diay? Arang-arang nalang intawon.” matud pa ni Apura.

Mapasalamaton si Apura sa kapolisan nga mihimo og ‘extra effort’ aron masikop ang mamumuno kinsa nasuta usab niyang ilaha rang paryente. “Maayo hinuon kay nadakpan na, makapangutana na ta ba og unsay iyang rason nganong iyang gipusil akong anak,” matud pa sa mayor. (BANAT NEWS)