Drugs ilabay gikan sa OSC padung city jail

CEBU, Philippines - Gisikop sa mga jailguards sa Operation Second Chance sa barangay Kalunasan sa dakbayan sa Sugbu ang usa ka 28-anyos nga lalaki human kini misuway pagpalusot og ginadiling drugas nga shabu niadtong milabay’ng hapon. Ang gisikop mao si Jupiter Mayola, 28, taga sitio Barracks sa barangay Ermita kinsa nabilanggo na niadtong tuig 2003 tungod sa kasong paghupot og ilegal nga drugas

Si SJO2 Cristory Gatuba ang Deputy Jail Warden sa Cebu City Operation Second Chance Center alang sa mga minor offenders sa interbyu sa Tv5 Aksyon Bisaya ang mga kontrabando sama sa ilegal nga drugas ilabay padulong sa New Cebu City Jail

Duha ka stick sa marijuana ug usa ka botelya sa nubain ang nakuha sa mga gwardiya gikan sa suspek nga gisulod sa putos sa instant noodles lakip sa nasakmit ang 50 ka mga disposable lighters. 

 Si Mayola kasamtangan karung gitanggong sa Guadalupe Police station ug gipaabot nga pasakaan siya og tukmang kaso karung adlawa.

Matud ni Supt. Johnson Calub, Jail Warden sa CCJ nga nahinabi sa Banat News nga tungod sa ka istrkekto nila sa mga ‘dalaw’ gigamit sa mga tawo ang mga minor offenders sa Cebu City Operation Second Chance Center (CCOSCC) sa pagpalusot sa illegal nga kontrabando paingon sa ilang pasilidad.

Siya mitataw nga dunay mga minor offenders sa CCOSCC may igsuon nga nabilanggo sa CCJ nga maoy gigamit sa pagpalusot og drugas pinaagi sa ‘bombing.’

Plano ni Calub nga sementohon ang nabakanteng paril ubos sa gibutangan sa fish net kay anha ilabay ang illegal nga kontrabando gikan sa CCOSCC paingon sa ilang pasilidad.

Si Mayor Michael Rama mimando sa Bantay Dagat Commission aron pagpahulam og pukot ngadto sa maong mga bilanggoan aron iali sa ibabaw sa mga kural niini. (BANAT NEWS)