Wa sugta sa gipanguyaban naghikog

CEBU, Philippines - Usa ka ulitawo nagpakamatay kay wala sugta sa dalaga nga iyang gipanguyaban didto sa Sitio Cogon, barangay Catarman, lungsod sa Liloan kagahapon sa ala 1:30 sa kaadlawon.

Ang naghikog mao si Alfredo Apas Marikit, 38, ulitawo, nga taga Sitio Pilapilan, barangay Yati lungsod sa Liloan.

Ang babaye nga iyang gipanguyaban ug gihigugma sa hilom mao si Maricel Cabatlaw Arkay, hingkod, ug nagpuyo sa balay ni Lucricio Apas nga paryente ni Marikit.

Si PO2 Renato Pindo sa Liloan Police Station mibutyag sa Banat News  nga si Maricel mitug-an nga sa wala pa ang hitabo nagpunay og panguyab kaniya si Marikit apan wala niya sugta.

Matud pa niya nga nagkasabot sila niadtong Martes sa gabii   nga motambong og disco party didto sa Tayud covered court usa ka kalingawan agi og pangandam sa piyesta sa maong lugar.

Pag-abot nila didto, si Marikit mihangyo kaniya manayaw sila apan mibalibad siya kay wala siyay gana nga mosayaw sa maong higayon.

Hinungdan nga nakahukom sila nga mamauli sa maong higayon. Apan samtang naglakaw sila sa dalan padayon sa pagpangamoral kaniya ang ulitawo apan padayon usab siyang mibalibad niini kay wala pa siyay plano nga makabaton og uyab. Unya sa pag-abot nila sa balay nga iyang gipuy-an mideretso siya og sulod sa kwarto aron likayan ang biktima.

Paglabay sa 30 minutos, matud pa ni Maricel   migawas siya sa lawak ug gisusi kun mipauli na ba ang ulitawo dihang nakurat nalang siya sa iyang nakita   nga nagbitay na kini.

Nasuta niya ang pisi nga gibalikos sa liog niini kansang pikas tumoy gigaid sa sagbayan sa balay nga iyang gipuy-an.

Dali siyang nangayo og panabang sa mga silingan apan nabugtoan na sa kinabuhi si Marikit. (BANAT NEWS)