Compostela bag-o og kura-paruko

CEBU, Philippines - Bag-o og kura paruko ang lungsod sa Compostela sugod ugma nga maoy hulip   sa kontrobersyal nga si Reverendo Padre Jonathan Lao. Si Msgr. Renato “Renren” Beltran Jr.   maoy napili ni Cebu Archbishop Jose Palma nga idestino sa lungsod sa Compostela.

Si Archbishop Palma mitakda sa pag-instalar sa maong bag-ong kura paruko sa lungsod ugma sa alas 9:30 sa buntag nga gipaabot nga saksihan sa kadagkuan sa Archdiocese ug mga parokyano sa Compostela.

Si Padre Lao nga maoy outgoing parish priest sa Compostela gikagubtan  sa katawhan sa maong lungsod ug gipitisyonan tungod sa pasangil nga pagdumili niini pag-ila sa mga santos nga rebulto sa simbahan.

Si Louie Reyes usa sa mga parokyano ug kanhi municipal administrator mitataw nga ang pagkatudlo kang Msgr. Beltran nga bag-ong pari sa Compostela haom kaayo alang sa ilang pagpangandam sa nagsingabot nga tinuig nga kapistahan ni Sr. Santiago de Apostol nga maoy patron sa lungsod karong umaabot nga Hulyo 24 ug 25 , 2012. Gipaabot nga sugaton sa bagang duot sa mga Compostelahanon ang instalasyon ug pag-asumir ni Msgr. Beltran ugma. (Darrel A. Carumba) (BANAT)