CEBU, Philippines - Ang mga tinun-an nga gradwado sa high school mas maayong mokuha og short-term nga kurso kaysa sa magpadayon sa pagtungha sa kolehiyo.
Kini ang pagpadasig ni Kalihim Emmanuel Joel Villanueva ,Technical Education and Skills Development Authority, (TESDA) sa tanang mga kabus nga high school graduate kinsa nagkanayon nga ang padayon nga pagsaka sa matrikula sa kolehiyo maoy usa sa dakong babag sa mga tinun-ang kabus.
Matud pa niya nga ang nakapait ra ba kay kun mopadayon pagkuha og kurso sa kolehiyo dili usab makasiguro nga makakita dayon og trabaho inig-graduwar og kurso sa usa ka propesyonal.
Maoy hinungdan nga alang kang Villanueva nga angay bag-ohon sa mga ginikanan ang ilang huna-huna kay ang taytayan sa pag-asenso makab-ot lamang kung ang usa ka gradwado sa kolehiyo makakita dayon og trabaho.
Busa gipasabot pag-ayo ni Villanueva sa mga ginikanan nga kuwartahan, dili problema kun pakuhaon gyud og tag-upat ka tuig nga kurso sa kolehiyo ang ilang anak.
Apan kun apiki gyud sa kuwarta gidasig ni Villanueva ang mga kabus sa pagdangop nalang sa mga kurso sama sa gitudlo sa TESDA aron gamay ra og gasto ug makakita pa dayon og trabaho.