Bayong-bayong gisuwaya'g salvage

CEBU, Philippines - Nalandig sa tambalanan ang usa ka bayong-bayong human kini suwayi og patay sa tulo ka mga lalaki niadtong Martes sa kaadlawon didto sa Southwinds Subdivision, sa sitio Nonoc, barangay Cansojong dakbayan sa Talisay.

Ang   biktima usa ka 16-anyos, samdan sa buko-buko ug usa sa tulo ka lalaki nga mi-salvage kaniya nailhan lang sa ngalang JR nga taga sitio Mananga, barangay Tabunok sa maong dakbayan.

Si Calexto Manabat, non-uniform personnel (NUP) sa Talisay City Police Station mibutyag sa Banat News kagahapon nga subay sa imbestigasyon nila ni PO2 Roy Lofranco ug PO1 Euwen Pitogo   ang biktima gipasanginlan nga manglungkabay sa Mananga.

Sa alas 2:30 sa kaadlawon sa nahisgutang adlaw ang biktima kinsa nag-estambay duol sa usa ka kan-anan sa Tabunok giingong gipugos sa suspetsado ug sa duha niini ka wala hiilhing mga kauban pagpasakay sa ilang gisakyan

Unya giingong gigapos sama sa baboy ang biktima sulod sa sakyanan ug pag-abot didto sa Southwinds gitukmod sa suspetsado ang biktima busa natagak kini ug gipusil.

Unya si JR ug ang iyang mga kauban daling mibiya sa lugar.

Apan mga alas 5:15 sa hapon sa maong adlaw usa sa mga kauban sa suspetsado nasikop sa gipahigayong hot pursuit operation nila ni Inspector Hugo Rio Ipong ug Inspector Ricardo Echavez uban ni SPO4 Daniel Tarucan.

Ang nasikop mao si Ranny Vallente, 34, taga sitio Mananga kinsa maoy tag-iya ug nagmaneho sa kolor green nga multicab nga gikargahan nila sa biktima

Si JR kinsa pag-umangkon ni Vallente nailhan sa tinuod niyang ngalan nga mao si Tito Arevalo, Jr., 25.

Apan nakasibat kini ug wala hidakpi sa kapolisan.

Si Vallente gidala sa mga polis ngadto sa Talisay District Hospital nga nahimutangan sa biktima ug positibo siyang gitumbok sa naulahi nga maoy nimaneho sa multicab nga gipasakyan kaniya dihang gi-pick-up siya sa Tabunok. (/WC) (BANAT)