Wala mopaubos sa ilang pletihan

CEBU, Philippines - Samtang dako ang paglaom sa mga pasahero nga mokunhod o mobalik sa minimum nga plitehang P7.50 ang mga pasaheroan subay sa direktiba sa Land Transportation and Franchising Regulatory Board duna gihapoy mga drayber ang wala mosunod niini.

Ang kamandoang pagpaus-os sa pletihan subay kini sa dakong pag us-os sa presyo sa petrolyo sa kalibutanong merkado duha na ka higayon, ang labing uwahing pag-ubos sa presyo P1.75 matag litro.

Apan ang mga drayber wala gyud gihapon motuman niini ug ang mga pasahero nga mobayad og P10 nga suklian lang og P2 dili nalang managinot sa gikawat’ nga P.50 sa mga drayber.

Si Artemio Arcenal, 30, taga Cone 3, barangay Pagsabungan, dakbayan sa Mandaue ug nagtrabaho isip ahente sa softdrink company nga nahinabi sa Banat News miingon nga makiangayon lamang nga kunhoran ang plitehan tungod kay duha na ka hugnang oil price decrease.

Si Benjamin Ryan Yu nga maoy pangulo sa Cebu Integrated Transport Services Cooperative (CITRASCO) mihangop sa maong kalamboan tungod kay makaayo kini sa mga drayber.

Apan alang kaniya, bisan pa man niini dili kini paigong himuong basehan sa pagpakunhod sa minimum nga plitehan nga P8 sanglit ang presyo sa matag litro sa petrolyo wala man moubos kutob P40 matag litro nga diin P7.50 pa ang minimum.

Hinuon gipahibalo niyang isibog na nila ang gi-file nilang petisyon nga na-pending karon sa LTFRB Central Office hangtod na niining panahona nga nangayo og P1.50 nga dugang sa kaniadto P7.50 nga minimum.

Si LTFRB-7 director Ahmed Cuizon mihangyo sa mga drayber ug operators sa pagtuman sa bag-ong pletihan sanglit hasta man ilang mga kabanay unya ang makatilaw niini ug maayo usab pamalandungon nga nakatilaw ang publiko og tiunay nga pagkunhod bisan sa kagamay niini. BANAT NEWS