CEBU, Philippines - Gitagalan og duha ka semana ni Governor Gwendolyn Garcia ang mga tag -iya sa 45 ka mga illegal structure sulod sa 20- meter easement zone sa Kawasan falls, sa lungsod sa Badian sa pagguba sa ilang mga payag.
Gihimo sa gobernador ang maong pasidaan kay nakalapas sa balaod ang nahisgutang mga estraktura busa kinahanglang mapapas kini sa maong lugar.
Gibase sa gobernador ang iyang pasidaan sa presentasyon nga gihimo ni Engr. Adolfo Quiroga ang Provincial Planning and Development Office Chief ug Officer in Charge sa Provincial Engineering’s Office kinsa maoy mikompirmar sa eksistido nga 45 ka mga payag nga gitukod nga walay pagtugot ug kumo kay anaa kini sulod sa sona diin gidili ang pagtukod og mga estraktura sa nahisgutang busay busa angay kining panggub-on.
Hinuon mitanyag ang gobernador nga kun ang mga tag-iya mismo sa maong mga payag maoy boluntaryong moguba niini, andam siyang mohatag kanila og relocation site diha gihapon sa palibot sa busay apan gawas na sa 20-meter easement zone .
Samtang si Regional Director Maximo Dichoso sa Department of Environment and Natural Resources(DENR)7 mimugna dayon og grupo nga gitahasan sa pag-survey sa mga luna nga naglibot sa Kawasan falls.
Kini human suspensoha ni Gobernador Garcia ang pagpasulod og mga turista sa maong busay tungod sa pagmagahi sa mga tag-iya sa mga illegal structure sa pagguba sa ilang mga tinukod nga payag.
Si Wifredo Calledo sa buhatan sa CENRO-Argao nagkanayon nga gisusi sa grupo ang kahimtang sa mga illegal structure, kahimtang sa palibot sa busay ug ang relasyon sa tubig niini sa Matutinao river ug uban pang isyu nga may kalambigitabn sa Kawasan falls. BANAT NEWS