Mag-uuma gipusil patay

CEBU, Philippines - Namatay diha-diha ang usa ka mag-uuma human pusila sa wala hiilhing kriminal didto sa sitio Kalbasaan sa barangay Campo-7 sa lungsod sa Minglanilla sa miaging gabii.

Ang biktima mao si Romeo Corpuz, 58, biyudo ug mag-uuma nga nagpuyo sa sitio Mananga sa nahisgutang lugar.

Si SPO1 Florante Capangpangan sa Minglanilla Police Station ug mga kaubanan maoy daling miresponde sa maong alarma human madawat ang taho kalabot sa maong krimen gikan sa usa sa mga nakasaksi   nga si   Rubie Gantalao.

Sa wala pa ang hitabo nasayran sa kapolisan nga ang biktima nakig-inom sa iyang mga higala nga sila si Ryan Cañedo, Randy Obsional sa balay ni Melvin Gadiano nga ilang silingan.

Sa pagka- alas 7:00 sa gabii nananghid ang biktima nga mopauli sa ilang balay apan samtang naglakaw kini sa dalan mao nalay nadunggan sa mga silingan ang buto-buto sa armas ug dihang ilang gisusi   maoy ilang nakita nga patay na ang biktima duol sa usa ka bung-aw kansang ulo maoy naigo sa bala.

Sa pagkakaron padayon giimbistigar sa kapolisan ang maong hitabo. BANAT NEWS