Hepe gihulga sa drug lord

CEBU, Philippines - Nabalaka ang hepe sa kapolisan sa lungsod sa Argao human makadawat og hulga gikan sa usa ka drug lord nga panimaslan ang iyang pamilya tungod sa pagpanakop nila sa mga drug personalities sa maong lungsod.

Si Insp. Alejandro Batobalonos, hepe sa Argao Police Station mibutyag nga nakadawat siya sa maong hulga tulo ka oras human ilang nadakpan sa buybust operation si Joel “Bro” Miñoza, nga usa ka level two drug pusher niadtong Sabado sa hapon diha sa sitio Tikoy, Barangay Bogo.

Nagdumili pagtug-an si Batobalonos sa pangalan sa maong drug lord, hinuon iyang giangkon nga nakaila na siya niini.

“Naalarma ko’g gamay kay sa tinuod sayon ra man gyud kuhaon akong pamilya kung ila gyung tinud-on,” sumala pang Batobalonos.

Usa sa mga text message nga nadawat ni Batobalonos nga nagkanayon, “Sir ayaw palabi. Sige nalang ka panakop. Basin nagtuo ka dili ka mabawsan. Sayon ra kuhaon imo pamilya. Bisan imo pa anak kaya namo bawsan.”

Si Miñoza nadakpan na sa kapulisan sulod sa lima ka higayon ug niadtong Sabado maoy ikalima ug nakuhaan og usa ka plastic nga may sulod 13 pakete sa gituohang shabu; P500 marked money; usa ka pakete sa shabu nga maoy subject sa buy-bust; ug P2,600 nga cash nga gituohang halin.

Si Miñoza nakombikto kaniadto apan nakagawas tungod sa probation, duna pa kini duha ka pending nga kasong illegal possession of illegal drugs nga iyang napiyansahan.

Niadtong Hunyo sa miaging tuig, si Batobalonos nakadawat usab og hulga pinaagi sa text gihapon human usab ilang nadakpan ang usa ka Edgar Tapayan sa Barangay Talaga. Si Tapayan usa ka level two drug pusher. (BANAT NEWS)