Tau Gamma mihimakak

CEBU, Philippines - Kusganong gihimakak sa kadagkuan sa Tau Gamma Phi fraternity nga may kalambigitan ang ilang sakop sa pagpusil patay sa anak ni Mayor Nicepuro Apura sa dakbayan sa Carcar nga si Carl Vinsun Apura, 25, niadtong Domingo sa kaadlawon atol sa disco concert diha sa barangay Valladolid.

Kini samtang ang kapolisan mibutyag nga duna na silay lima ka mga pangalan sa mga tawong posibleng may kalambigitan sa krimen apan gawas sa fraternity war gisubay usab nila ang ubang anggulo sumala pa sa hepe sa Carcar City Police Station nga si Chief Insp. Teodulfo Manatad.

Si Rico Osmeña, tigpamaba sa Tau Gamma Phi sa press conference kagahapon diha sa Rajah Park Hotel mipasabot nga walay kalambigitan ang ilang grupo sa maong krimen nga mao karoy nanggawas sa mga balita.

Nasayran human sa hitabo niadtong Domingo, usa ka 17-anyos nga menor de edad nga lalaki nga sakop sa Tau Gamma Phi ang gi pick-up sa kapulisan human kini dudahing kauban sa nipusil patay sa biktima, hinuon gibuhian ra kini.

Mipasabot si Osmeña nga duna silay pinirmahan tali sa kadagkuan sa Alpha Kappa Rho (Akrho) diin masakop si Apura nga hunongon na nila ang ilang panagbangi ug ipatigbabaw ang kahusay ug kalinaw sa duha ka grupo. Gani daghan nang mga proyektong nahimo ang maong duha ka fraternity nga ilang gitabangan nga malampuson sa nagkadaiyang lugar sa Sugbo.

Daw gibasol ni Osmeña ang kapulisan nga mitumbok dayon sa anggulong may kalabotan sa fraternity ang krimen kay miyembro sa Akrho ang biktima.

Nanghinaot kini nga palawman og maayo sa kapulisan ang ilang imbestigasyon aron molutaw ang tinuod aron dili momugna og dakong gubot sa ilang mga fraternity. Gibutyag ni Osmeña nga nakadawat siya og report nga sa miaging gabii ang Akrho Balamban Chapter nagtigom ug mibahad nga mobawos sila diha sa dakbayan sa Mandaue ug Carcar.

Nanawagan siya sa mga sakop sa Akrho nga ipatigbabaw ang kalinaw tungod kay sulod sa pipila na ka tuig nga wala silay kagubot, apan tungod niini subli na usab maapektahan ang ilang pamilya ug organisasyon sa maong isyu.

Gipasalig niini nga andam silang makig-alayon sa kapulisan kun ugaling gikinahanglan.

“We have dug deeper whether frat related or not, amo lang, we will try to help it out. We denounced such act, nanghinaot lang mi dili lang sa ta mohukom dayon kay ang pulis ilambigit dayon ang fraternity aron masulbad dayon ang kaso,” sumala pa ni Osmeña.

“We wanted Cebu to be a peaceful community, dili na panahon nga (mag)binata. We learned from our lessons,” pasabot pang Osmeña. (EIM)(BANAT NEWS)