Sakop sa Mindanao rob gang sikop

CEBU, Philippines - Usa ka lalaking giingong miyembro sa high profile robbery group gikan sa Mindanao ang nadakpan sa kapulisan niadtong miaging semana dinhi sa dakbayan sa Sugbu.

Apan ang kapulisan sa dakbayan sa Sugbu nagdumili pa sa paghatag sa pangalan sa ilang dinakpan sanglit gisubay pa ang usa ka kauban niining nakaikyas.

Daan nang gipahibalo sa Regional Intelligence Division (RID) sa miaging buwan ang kabahin sa presensya sa Mindanao robbery group nga ania dinhi sa rehiyon.

Ang nakadakop sa suspek mao ang mga sakop sa Investigation and Detective Management Branch (IDMB) sa Cebu City Police Office (CCPO) diha sa barangay Labangon niadtong Biyernes sa kaadlawon.

Usa ka .45 nga kalibre sa armas ang nakuha sa kapulisan diha sa posisyon sa suspek kinsa wala ra mosukol sa kapulisan.

Si Sr. Supt. Melvin Ramon Buenafe, hepe sa CCPO nagkanayon sa mga tigbalita nga pulos sensitibo ang mga impormasyon nga ilang nakuha tungod sa background sa grupo.

Si Buenafe subling mihangyo sa tabang sa publiko pinaagi sa pagpaniid sa ilang mga lugar bahin sa mga tawong bag-ohay pang nangabot unya kadudahan ang linihokan. (EIM) (BANAT)