Condo project sa Lorega gikalipay sa Malacañang

CEBU, Philippines - Gikalipay sa Malacañang ang katukoran sa tulo ka andana nga edipisyo alang sa 40 ka pamilya sa barangay Lorega kinsa apektado sa gihawanan nga menteryohan sa maong barangay.

Si Undersecretary Jose Mari Oquiñana sa Presidential Communication Operations Office (PCOO) for Special Concern mibutyag sa Banat News nga ang Gawad Kalinga Lorega San Miguel Condovelle I usa sa katumanan sa pangandoy ni Presidente Benigno Aquino nga kahatagan og libre nga puloy-anan ang mga kabus sa nagkalainlaing dapit sa nasud.

Ang maong edipisyo nga gisubhan niadtong Biyernes sa hapon gigastohan og kapin sa P1 milyon gikan sa pork barrel ni Congresswoman Cutie dela Mar sa amihanang distrito sa dakbayan sa Sugbo.

Human sa pagsubo unang gipapuyo ang 40 ka pamilya sa 60 ka unit nga edipisyo.

Si Evangeline Bulawit , usa sa mga makapuyo sa maong edipisyo nagkanayon nga may bayranan silang P300 matag buwan isip monthly dues nila sa ilang kapunongan samtang ang bayranan sa tubig ug suga ila nga abagahon.

Matag unit sa maong edipisyo may gidak-an nga 24 por 20 ka tiil nga igo kaayo sa usa ka pamilya.

Matud pa ni Bulawit nga ang ubang mga pamilya mosunod usab sa pagbalhin sa lawak nga gidestino alang kanila sa umaabot nga mga semana hangtod nga ang tanang benepisyaryo sa maong proyekto makabalhin niini.    - BANAT NEWS