Hangyo luna sa LTFRB sa CPA gibalibaran

CEBU, Philippines - Ang Cebu Port Commission (CPC) mibalibad sa gihangyo sa Land Transportation Franchising and Regulatory Board (LTFRB) 7 nga 3,000 square meter nga yuta alang sa pagpatukod sa ilang regional office building. Sa suwat sa CPC niadtong Mayo 4 ning tuiga, si Vice Chairman and Cebu Port Authority (CPA) general manager Engr. Dennis Villamor mipahibalo ni LTFRB-7 Regional Director Ahmed Cuizon mahitungod sa maong pagbalibad human sa ilang  29th Regular Board Meeting niadtong Mayo 5.

Ang maong hangyo sa pagpangayo og tabang ngadto sa CPA sa paghatag og luna natuki uban ni transportation and communications Secretary Mar Roxas atol sa Regional Management Council Meeting niadtong Enero 31 ning tuiga.

Matud pa ni Cuizon sa iyang suwat niadtong Pebrero 1 ning tuiga nga ang LTFRB-7 usa sa tulo ka mga rehiyonal nga buhatan sa maong ahensya ang walay kaugalingong edipisyo.

Ang gihangyo nga funding nga nagkantidad og P50 milyones alang sa pagtukod sa building naaprobahan na sa DOTC apan wala’y giluwatang budget alang sa acquisition sa yuta maong naagni si  Cuizon sa paghangyo sa CPC sa pagdonar og yuta.

Sa sayo pa, si Cuizon nagpasalamat sa kapasidad sa CPA sa pagtabang kanila nga gihimo atol sa RMC meeting nga gipanguluhan ni Roxas.

Ang LTFRB kasamtangang nangabang didto sa J.King Building sa North Reclamation Area sa Sugbo. BANAT NEWS