Sonny O. paukyab ra - Pabling

CEBU, Philippines - Paukyab lang ang tanang mga pamahayag ni kanhi senador John Henry “Sonny” Osmeña, sumala pa ni Deputy Speaker Pablo “Pabling” Garcia sa ikaduhang distrito sa lalawigan sa Sugbo.

“Daghan man kaayo panulti nianang Sonny nga paukyab ba,” sumala pa sa 87 anyos nga si Garcia.

Si Osmeña, 77, mibutyag nga niadtong Huwebes Santo giingong gidala ni Hilario Davide III ang 15 ka mayor sa sa distrito ni Garcia nga sakop sa One Cebu Party didto sa kauluhan aron ipaila-ila sa kadagkoan sa Liberal Party.

Apan ang maong taho gihimakak ni Davide kinsa maoy pangulo sa LP sa lalawigan sa Sugbo.  Nasayran nga dili maayo ang relasyon karon ni Osmeña ug Davide bisan pareho silang sakop sa LP.

Si Osmeña dili na mosuporta kang Davide sa pagpapili niini sa pagka-gobernador sunod tuig nga eleksiyon.

Laing paukyab ni Osmeña mao ang giingong paghangyo nilang kanhi Kong. Raul del Mar ug Bise-Mayor Joy Augustus Young sa dakbayan sa Sugbo ngadto ni Bokal Wilfredo Caminero nga modagan pagka-kongresista batok ni Garcia.

Apan si Garcia wala motoo niini sanglit kompleto ang grupo sa One Cebu sa ikaduhang distrito.

“Wa man tingale, anything is possible, wa pa ma’y mga talimad-on, 15 mayors naa gihapon sa One Cebu,” matud pa ni Garcia.

Laing gitumbok ni Garcia nga paukyab ni Osmeña mao kadtong iyang pagdagan pagka-mayor sa dakbayan sa Sugbo apan sa kaulahian gibakwi niya kini.

Si Osmeña niadtong una mipadayag nga modagan sa pagka-kongresista sa ikatulong distrito sa lalawigan sa Sugbo apan sa niaging Biyernes, nipahibawo kini nga hayan pagka-mayor na usab sa dakbayan sa Toledo ang iyang lansaran. BANAT NEWS