CEBU, Philippines - Higpit na nga ipatuman sa kagamhanan sa dakbayan sa Mandaue ang pagpahiklin sa mga molupyo nga nahimutang sa kuyaw nga lugar sama sa tampi karong nagsingabot na usab ang panahon sa tinguwan.
Kini ang gibutyag ni Manlalaban Jiovanni Tianero, legal officer sa maong dakbayan kinsa nagkanayon nga adunay mga balay sa pipila ka barangay sa dakbayan nga panggub-on na unta sa mga sakop sa city anti squatting team sa miaging bulan apan wala mahinayon tungod kay mihangyo ang mga hingtungdan nga sila nala’y boluntaryo nga moguba sa ilang balay.
Naglakip sa mga gihatagan og higayon sa pagguba sa ilang mga balay mao ang nagpuyo sa Butuanon River.
Gusto usab ni Tianero nga mahawanan sa mga balay ang mga sapa sa dakbayan sama sa barangay Subangdaku, ug Banilad kay mao kini nakaingon sa pagkabara sa inagas sa tubig sa sapa. BANAT NEWS