Danyos sa sunog sa Brgy. Luz P51.6milyones

CEBU, Philippines - Moabot na ngadto sa kapin sa P51.6 milyones ang danyos sa sunog nga miigo sa lima ka sitio sa barangay Luz sa miaging adlaw sumala pa sa departamento sa dakbayan sa Sugbu nga maoy miatiman sa mga nasunogan.

Base sa talaan sa Department of Social Welfare and Services (DSWS) sa siyudad moabot ngadto 570 ka pamilya o 2,200 nga mga indibidwal ang naapektahan sa sunog sa sitio Santa Cruz, Santo Niño, Lubi, Abellana ug Central.

Ang head sa DSWS nga si Dr. Ester Concha nagkanayon nga modako pa ang maong gidaghanon sanglit nagpadayon pa ang lapad nga ebalwasyon.

Samtang ang kapitan sa maong barangay nga si  Rian Tante mipadayag nga tun-an pa niya ang sugyot ni Mayor Michael Rama nga dunay reblocking sa mga balay tungod kay daghan ang misupak nga ang tanang naapektahan ireblock tungod kay titulado ang kasagarang yuta sa maong dapit.

Gipahigayon usab gabii ang diskusyon aron paminawon ang sentimento sa mga biktima sa  sunog ug nanghinaot sila paminawon sila sa siyudad.

Gitun-an na karon sa Department of Engineering and Public Works (DEPW) ug ang Management Information Computer Services (MICS) kun unsaon pag-reblocking ang maong mga sitio.  BANAT NEWS