Abogado: Operasyon sa jadewell ilegal

CEBU, Philippines - Gipahimangnoan ni Atty. Jiovanni Tianero, ang legal officer sa dakbayan sa Mandaue ang towing company nga Jadewell Parking System Corporation nga ilegal na ang operasyon niini pagpangguyod og sakyanan diha sa kadalanan sa siyudad tungod kay pormal nang napupos ang kontrata niini sa siyudad niadto pang Mayo 5.

Gitataw ni Tianero nga gawas nga giputol na ang kontrata sa maong kompaniya ug sa kagamhanan sa dakbayan wala na usab kini business permit alang karong tuiga. Gitambagan usab ni Tianero ang mga motorista sa pagpasaka og reklamo batok sa maong towing company kun guyoron ang ilang mga sakyanan sanglit wala na hatagi og pagtugot sa siyudad ang maong kompanya.

Apan ang operations manager sa maong towing company nga si Tomas Villanueva miingon nga pabilin sila sa ilang operasyon tungod kay wala pa silay nadawat nga kamandoan gikan sa konseho nga pinirmahan ni Mayor Jonas Cortes o bisan na kamandoan gikan sa korte.

Gani sukad niadtong Huwebes sa gabii hangtud sa Biyernes sa buntag matud pang Villanueva nakaguroy sila og napulo ka mga sakyanang nakalapas sa ordinansa sa dakbayan. Gipanghimakak hinuon ni Villanueva nga wala silay business permit karong tuiga tungod kay ang ilang business permit unya pa mo-expire sa Disyembre 31, 2012.

Dugang nga gipanghimakak ni Villanueva ang alegasyong wala sila makabayad sa 10 porsiyento sa ilang kinitaan ngadto sa siyudad matag bulan sanglit niadto lang bulan sa Marso mibayad sila og P93 mil ug P103 mil sa bulan sa Abril.

Nabalaka hinuon si Villanueva nga makulban sa kaldero ang ilang mga kawani kung mahitabong dili na sublion ang kontrata nila sa siyudad.

“If recession is true, our employees will be in misery and 29 Jadewell workers would lose their jobs,” pasabot pang Villanueva. Ang Jadewell nagserbisyo sa dakbayan isip towing company and pay parking services sa kagamhanan sa maong dakbayan. (BANAT NEWS)