Sa kasaysayan karon Mayo 13

CEBU, Philippines - 1903— Namatay ang usa sa mga bayani sa nasud nga si Apolinario Mabini (Hulyo 23,1864-Mayo 13,1903) sa Manila tungod sa sakit nga cholera sa edad nga 38-anyos. Si Mabini giisip nga usa ka political philosopher ug maoy misuwat sa labing unang konstitusyon sa tibuok Asya nga gihimong basehan sa First Philippine Republic niadtong 1899-1901 siya usab maoy unang nahimong primero ministro sa nasud. Mas naila siyang “Utok sa Rebolusyon” ug gikalagutan sa mga Amerikano tungod sa pagmagahi niini pagsunod sa ilang pangagamhanan.

1643 – Usa ka kusog nga linog ang miigo sa Santiago sa nasud sa Chile diin tulo ka bahin sa kinatibuk-ang populasyon niini ang nakalas.

1981 – Gisuwayan pagpatay sa labing unang higayon si anhing Santo Papa John Paul nga usa na ka beato karon. Ang suway pagpatay nahitabo diha sa St. Peter’s Square sa Vatican City sa usa ka Turkish nga si Mehmet Ali Agca. Nadakpan hinuon si Agca ug nasentensyahan sa Italian court apan gipasaylo kini sa Santo Papa ug gihatagan og pardon ni Italian president Carlo Azeglio Ciampi tungod sa hangyo gihapon sa Santo Papa ug gi-deport si Agca sa Turkey niadtong Hunyo 2000. (FREEMAN)