6.8 milyones populasyon sa CV

CEBU, Philippines - Misaka na sa 6.8 milyones ang populasyon sa Central Visayas sumala sa labing ulahing census sa populasyon sa National Statistics Office (NSO) niadtong Mayo 1, 2010.

Nadugangan kini og 1,093,227 gikan sa survey niadtong tuig 2000 diin may 5,706,953 ang katibuk-ang populasyon sa rehiyon 7. Sa upat ka probinsya sa Central Visayas ang probinsya sa Sugbo nagpabilin   nga maoy labing dako og populasyon nga mikabat sa 2,619,362 ka tawo.

Kini walay labot ang tulo ka mga dagkong siyudad sama sa Cebu, Mandaue ug Lapulapu.

Ang dakbayan sa Sugbo may katibuk-ang populasyon nga 866,171, Mandaue 331,320 ug ang Lapulapu may 350,467.

Ang probinsya sa Negros Oriental nagsunod sa probinsya sa Sugbo nga may 1,286,666; Bohol 1,255,128; ug ang Siquijor may 91,066 nga populasyon. 

Ang 2010 nga population survey sa NSO maoy ika-13th nga serye sa census sa populasyon sa nasud sukad niadtong 1903. (BANAT NEWS)