Kampanya batok rebelde gipahugtan

CEBU, Philippines - Labing gipahugtan sa militar ang kampanya batok sa insureksyon dinhi sa lalawigan sa Sugbo.

Kini human molanog ang mga balita kalabot sa laraw sa mga rebelding New People’s Army (NPA) nga ilang guboton    pagbalik ang Cebu human kini makabaton og kalinaw dihang nanurender ang mga rebeldeng lumad nga taga Sugbo ngadto sa kagamhanan sa lalawigan ug sa militar.

Pinaagi sa pagpaningkamot ni Gobernador Gwendolyn Garcia inabagan sa 78 Infantry Battalion (IB) sa Philippine Army (PA), nadeklarar ang tibuok lalawigan nga insurgency free.

Apan gikataho nga milihok na usab ang mga rebelde kay gusto na silang   moyaka   sa kabukiran ug kapatagan ning lalawigan aron kombinsehon ang katawhan nga motipon sa ilang kawsa pagbungkag sa gobiyerno.

Si 1Lt. Aladin Almendras ang Company Commander sa Alpha Company sa 78th IB –PA nagkanayon nga gumikan niini labi nilang gipahugtan ang insurgency awareness drive   ilabi na sa iyang area of jurisdiction sa may amihanang bahin sa lalawigan nga gilangkoban sa 22 ka mga lungsod ug 5 ka dakbayan.

Mihimo usab sila og mga kalihukan sa pagpalambo sa mga batan-on niining panahon sa bakasyon sa klase sama sa mga paugnat sa kusog ug uban pa aron masanta sila sa pagsalmot sa mga dautang bisyo. Matud pa ni 1Lt. Almendras nga kaabag nila ang suporta sa kagamhanan sa lalawigan sa ilang misyon. (/WC)  (BANAT NEWS)