Teddy vs Luigi sa sixto distrito
CEBU, Philippines - Hayan magkaatbang silang Kong. Gabriel Luis Quisumbing ug Bokal Thadeo Ouano sa eleksiyon alang sa sixto distrito.
Si Ouano nipadayag sa kaandam sa pagpapili sa pagka-kongresista ubos sa One Cebu Party karon nga si Quisumbing nitapon na sa Liberal Party.
Una nang gihugon-hugonan si Ouano nga modagan sa pagka-kongresista sa ikaunom nga distrito apan wala kini nahinayon sa dihang gidawat sa One Cebu si Quisumbing sa eleksiyon niadtong 2010. Ang secretary-general sa One Cebu, Kong. Pablo John Garcia, nipadayag nga usa sa ilang pilian si Ouano apan iyang giklaro nga estoryahan pa nila ni Ouano ang maong butang sa dili pa mohimo og desisyon ang partido.
Gipadayag hinuon ni Ouano nga kung dili mahinayun ang iyang pagdagan sa pagka-kongresista, labing seguro nga mopasubli siya sa pagka sakop sa Hunta Probinsiyal sa Sugbo.
Samtang hanap ang kahigayunan nga mahimong runningmate ni Garcia ang negosyanteng si Glen Anthony Soco.
Si Garcia mopapili sa pagka-gobernador sanglit mahuman naman ang termino sa iyang igsuon nga si Gob. Gwendolyn Garcia.
Si Soco mao ang runningmate ni Gwen sa niaging eleksiyon apan napilde siya ni anhing bise-gob. Gregorio Sanchez, Jr. Apan si Soco interesado gihapon nga mopapili pagbalik sa maong posisyon sa umaabot eleksiyon. Matud pa ni Garcia nga ila na nga gitanyag ngadto kang Bise-Gob. Agnes Magpale ang posisyon ug nagpaabot nalang sila sa desisyon sa partido ni Magpale. (BANAT NEWS)
- Latest
- Trending
