Namuyo duol sa Casa del Rio ipahiklin una

CEBU, Philippines - Girekomendar ni Mines and Geo-sciences Bureau-7 (MGB-7) Geologist Abraham Lucero Jr. nga ihiklin una sa mas luwas nga dapit ang mga molupyo duol sa nahugmak nga retaining wall sa Casa del Rio Subdivision sa barangay Talamban ning dakbayan nga mikalas og duha ug miangol og unom ka tawo. Si Lucero miingon nga atol sa pag-ugmad sa 20 metros nga retaining wall gigamitan lang kini og limestone, wala hinuon moingon si Lucero kung kini maoy nakaingon sa pagkahugmak.

Giklaro hinuon niyang ang limestone kun maayo pagkasansan usa sa labing lig-ong filling materials.

Matud pa ni Lucero kinahanglang susihon ug i-resize ang retaining wall aron mas mapalig-on ug dili basta mahugno, sa pagkakaron adunay bahin sa nahugnong retaining wall ang nangliki ug posibling maoy sunod nga mahugno.

Tungod niini kinahanglang ibalhin una ang mga nagpuyo duol niini ug did-an ang mga tawo nga makapaduol niini ug kinahanglan ang kanunay nga pag-monitor ilabi na kung ting-ulan. (BANATNEWS)