5 Ka sitio gilamoy sa sunog

CEBU, Philippines - Nagsusamang impiyerno ang lima ka sitio sa barangay Luz sa dakbayan sa Sugbu ug gibanabanang miugdaw sa 153 ka mga balay kagahapon sa hapon nga milanat og dul-an tulo ka oras una pa makontrolar sa kabomberohan.

Usa sa giingong hinungdan mao ang nabiyaang gilung-ag nga kan-on sa usa sa mga residente tungod kay mitan-aw og usa ka sikat nga noontime show sa GMA-7 kagahapon ug natalagim-an ang giluto niini.

Sumala pa sa imbestigasyon sa kabomberuhan ang sunog nagsugod sa panimalay sa usa ka Ramon Villegas, kinsa giingong didto sa kasikbit nga sitio aron motan-aw sa usa ka segment sa maong popular nga noontime show.

Hinuon nagdumili sa pagkompirmar niini ang kabomberohan samtang si Villegas wala pa ikahinabi sa mga imbestigador atol ning pagsulat sa balita aron matubag ang mga pasangil sa mga tawo.

Sa pagpakighinabi sa Banat News kang Cebu City Fire Marshall Sr. Supt. Aderson Comar ang lima ka mga apektadong sitio mao ang Sto. Niño Uno, Sta. Cruz, Lube, Abellana ug City Central.

Mitataw usab si Comar nga naglisod pagsulod ang mga firetrucks tungod sa kahagip-ot sa dalan tungod usab sa mga tawong nagdasok sa mga gagmay kaayong agianan nga nanghakot sa ilang mga kabtangan.

Nakadugang usab sa problema sa mga bombero ang kakusog sa huros sa hangin ug nahutdan usab sila og tubig tungod sa kalapad sa lugar nga nasunogan.

Lakip sa nakapalangay mao ang gilay-on nga 250 ka tiil gikan sa sentro sa kalayo ngadto sa dalan. Sagad sa kabalayan ginama sa gaay ug mixed materials.

Samtang dunay mga report nga naglisod ang koordinasyon sa mga miresponde tungod sa managlahing frequency sa ilang mga radyo.

Ang maong sunog giisa ngadto sa Task Alpha alarm tungod sa kadako na niini.

Si Provincial Fire Marshal Ismael Codilla kinsa usa sa mga miresponde mibutyag nga ang mga fire trucks sa Mandaue, Lilo-an, Minglanilla ug Consolacion, Lapulapu ug Talisay ang mitabang sa operasyon.

Gawas pa niini miabag usab ang nagkadaiyang barangay fire brigades sa siyudad ug ingon man ang Filipino-Chinese Fire Brigade, Emergency Rescue Unit Foundation ug Santo Niño Fire Brigade.

Gisugyot ni Kapitan Ryan Tante sa Brgy. Luz nga ideklara nga state of calamity ang ilang barangay aron makagamit sila sa ilang calamity funds. Samtang anha ipahimutang ang liboang mga residente sa Bario Luz Elementary School nga mga nasunugan.

Si Mayor Michael Rama kinsa miadto sa lugar luwan sa usa ka motorsiklo mibutyag nga ang social services sa siyudad maoy moabaga sa pasiunang panginahanglan./EIM)  (BANATNEWS)