CCPO mosusi kun may tulubagon ang developer

CEBU, Philippines - Samtang nagpadayon ang imbestigasyon sa Office of Building Officials ug sa dakbayan sa Sugbu kabahin sa nahugmak nga bahin sa Casa del Rio Subdivision sa barangay Talamban ning dakbayan, ang kapulisan nagsusi usab kung dunay criminal liability ang developer ug contractor sa maong hitabo nga mikalas og duha ug miangol og unom ka tawo.

Si Chief Insp. Romeo Santander, hepe sa City Intelligence Branch (CIB) miingon nga ila pang paaboton ang resulta sa imbestigasyon nga gihimo sa buhatan sa OBO bahin sa maong hitabo.

Matud niya kun mapamatud-ang dunay nahimong kalapasan sa habig sa developer ug contractor ila kining pasakaan og kasong reckless imprudence resulting to multiple homicide ug physical injuries and damage to properties.

Sa iyang bahin, si SPO2 Jay Yballe, imbestigador sa Homicide Section nagkanayon ila unang kuhaan og affidavit ang pamilya sa mga biktima ug sa mga nangaangol aron isuporta sa ebidensya sama sa death ug medical certificates ug ang pamahayag sa mga rescuers.

Si Wilma Tapdasan Adlaon kinsa igsuon sa namatay nga si Nestor Tapdasan miingon nga wala pa sila makadesisyon kun mopasaka og kaso sa developer apan kun mahitabo kini ilahang sabutan sa tanang nabiktima.

Gawas kang Tapdasan, laing namatay mao si Allan “Tera” Oporto ug nangaangol sila si Margie Tambagan, 30, anak nga si Nel Marie, 6; Erika Mae Mabuyao, 11, Erich Mabuyao, 2; Heroshi Enguito, 12; Jorjie Tambagan, 9.

Miabot og walo ka balay ang nahunlakan diin lima niini ang nadat-ogan sa kural sa kinatibuk-ang 60 ka panimalay ug gibasol sa mga biktima ang developer.

Si Jonjie Gonzales, nga maoy tigpamaba sa Commonwealth Estate Incorporated nga maoy developer niini, nagkanayon nga ilang abagahon ang galastohan sa tambalanan sa mga nangaangol ug ang burial expenses sa duha ka nakalas.(/EIM)  (BANATNEWS)