Suliran bahin imbornal hapit na masulbad
CEBU, Philippines - Hayan masulbad na ang problema sa baha ug sa sistema sa panganal dinhi sa Metro Cebu Area human tukia sa Metro Cebu Development Coordinating Board (MCDCB) ang gidusong Drainage Master Plan (DMP) sa mga membrong local government unit niini.
Kini ang gitug-an ni Cebu City Mayor Michael Rama ang Co-Chair sa MCDCB sa mga sakop sa media atol sa meeting sa MCDC.
Nasayran nga 7 sa 13 ka mga local government unit (LGU) nakaduso na sa ilang tagsa-tagsa ka Master Drainage Plan ngadto sa Department of Public Works and Highways (DPWH-)7.
Ang maong mga LGU mao ang Cebu City, Cordova, Danao City, Liloan, Mandaue City, Naga City ug Talisay City.
Sa maong DMP nga giduso nila ngadto sa DPWH nakita ang nag -unang suliran sa mga LGU sa Metro Cebu mao ang pagbaha sa ilang mga lugar ug ang kakulang sa pundo sa pagpatuman sa ilang plano.
Samtang si Governor Gwendolyn Garcia kinsa maoy pangulo sa MCDCB miasoy usab sa kalangan sa pagduso sa DMP sa 6 ka mga LGU nga gilangkoban sa Compostela; Consolacion; syudad sa Carcar; syudad sa Lapu-lapu; Minglanilla ug ang San Fernando.
Hinuon gibutyag sa maong tigum nga ang nahisgotang mga LGU gitakdang mosumiter sa ilang mga DMP sulod niining bulana. (BANATNEWS)
- Latest
- Trending
