Kaso sa dengue sa CV mitaas

CEBU, Philippines - Ang Department of Health (DOH)-7 nakatala og 6.1 porsento nga pagsaka sa kaso sa dengue sa Central Visayas niining bulan sa Enero 1 hangtod Mayo 5 ning tuiga kun itandi sa miaging tuig sa susamang bulan gihapon, base sa finding sa Regional Epidemiology and Surveillance Unit (RESU).

Matud pa ni Regional Director Dr. Asuncion Anden nga gikan sa Enero 1 hangtod Mayo 5 ning tuiga nakarekord sila og 2,049 ka kaso sa dengue, diin 19 ang namatay, itandi sa miaging tuig nga may 1,931 ka kaso sa dengue ug 14 ang namatay.

Ang labing daghang kaso sa dengue natala dinhi sa syudad sa Sugbo nga may 1,053 diin 9 ang patay, gisundan sa syudad sa Lapu-lapu nga adunay 115 ka kaso ug 2 ang patay. Sa Minglanilla adunay 110 ka kaso usa ang patay, dayon ang syudad sa Talisay may 93 ka kaso ug walay namatay, ang Liloan may 78 ka kaso ug usa ang patay.

Apan matud pa ni Anden nga nalipay sila sa balita gikan sa Mandaue nga nagpahibawo nga mikibra ang kaso sa dengue niini gikan sa ika-duha nga may labing taas nga kaso sa maong balatian sa miaging tuig. Niining tuiga nahimo nang ika-pito nga lugar sa may labing taas nga kaso sa dengue ang maong dakbayan.  

Sa laing bahin si Anden nagkanayon nga gipatuman na sa kagamhanan ang   gitawag nga Aksyon Barangay Kontra Dengue (AbaKaDa) .

Sa maong programa gitahasan ang matag kapitan sa barangay nga  maoy manguna sa iyang mga sakop sa pagpanghinlo sa ilang tagsa-tagsa ka panimalay matag adlaw. Sa iyang pahimangno higpit nga gitugon ni Anden nga    wagtangon sa matag palibot sa kabalayan ang mga butang kapundohan og tubig aron walay kapangitlogan ang lamok.  (BANATNEWS)