Ahente og armas tiklo

CEBU, Philippines - Nasikop sa kapolisan ang usa ka gun runner kon ahente og armas de fuego dihang wala siya masayod nga ang gibaligyaan niya og armas usa ka polis didto sa barangay Poblacion siyudad sa Danao niadtong Huwebes sa ala 1:00 sa hapon.

Ang nadakpan mao si Samuel Hermocilla, 25, taga barangay Kahomayan, dakbayan sa Danao.

Ang mga armas nga nasakmit gikan sa suspetsado mao ang usa ka kalibre .45 ug Ingram Assault pistol nga wala pay pasinaw.

Si SPO2 Ildofonso Prosia, Desk Officer sa Danao City Police mibutyag sa Banat News nga nasikop ang suspetsado human sa usa ka semana nga pagpaniid sa mga kapolisan kaniya kinsa nabaniog sa iyang negosyo nga pagpamaligya og armas de fuego.

Pinaagi sa buy bust operation nga gihimo sa hiniusang team sa Regional Intelligence Office sa PRO-7 ug sa kapolisan sa Danao nga gipangulohan ni SPO4 Nilo Durano Pantoja Jr., dali kaayong natiklo ang suspek dihang  usa ka polis nga nagpakaaron ingnong buyer og armas maoy nakigsabot kaniya.

Sa pagdawat sa suspek sa kuwartang gibayad kaniya bugti sa .45 kalibre nga pistola ug Ingram assault rifle, diha-diha giposasan siya sa mga polis nga diha sa iyang palibot ug gibalhug dayon siya sa prisohan uban sa kasong gisang-at batok kaniya.( /WC)  (BANATNEWS)