6 brgy. kap misupak sa pangangkon sa mayor

CEBU, Philippines - Kusganong gisupak sa unom ka barangay kapitan sa lungsod sa San Fernando ang pangangkon sa ilang mayor nga si Antonio Canoy nga nakahatag kini kanila og budget alang sa mga proyekto sa ilang barangay.

Si Panadtaran barangay kapitan Ricardo ‘Nonoy’ Reluya Jr., sa diha nga nahinabi mibutyag nga dako kaayong bakak ang gibuhiang pamahayag ni Canoy.

“Dako nang bakak. Sukad sa akong paglingkod wa koy nadawat sa munisipyo bisa’g piso,” matud pa ni Reluya.

Sumala pa niini nga kun aduna silay mga proyekto sa barangay adto nalang siya mangayo og tabang ni Gov. Gwendolyn Garcia ug 1st district Rep. Eduardo Gullas.

“Di ko ganahan nga gamiton mi niya sa iyang pag-ulog ulog sa mga tawo,” pasabot pa ni Reluya.

Samtang silang barangay Kapitan Nomilon Garces sa Sangat ug Reliso Enad sa Balud, Done Panadero sa Tanañas ug Jaycee Pelimer sa Pitalo parehas usab sa pangangkon ni Reluya nga walay kamatuoran ang gipangangkon ni Canoy.

Matud pa nila nga wala sila makadawat sa P120 mil nga budget sa miaging tuig ug P150 mil sa karung tuiga.

“Kaming unom ka kapitan, wa mi kadawat bisa’g gamay. Gipanggukod man gani mi nila. Wala man nay problema og tinuod pa na. Gamit unta kaayo na sa barangay,” matud pa ni Enad. Nagduda si Reluya nga sila maoy gigamit aron pagkuha og simpatiya sa katawhan si Canoy tungod kay ilang nasayran nga molansar kini pagka-kongresista sa 2013.

Kahinumduman nga si Enad uban sa mga opisyales niini gidakop pinasikad sa warrant of arrest tungod sa kasong maliscious mischief apan gibuhian tungod kay na-dismiss na diay ang kaso.

Si Enad mipasangil nga may bulok politika ang pagdakop kanila ug mipasangil nga dunay kalambigitan ang mayor butang nga gihimakak ni Canoy dihang nakahinabi sa Banat News. (BANATNEWS)