'Cable guy' mikirig patay

CEBU, Philippines - Mikirig ug namatay ang usa ka cable technician dihang kalit lang nakuryentihan sa pagkatkat sa atop sa usa ka panimalay sa barangay Guinsay, dakbayan sa Danao alas-4 pasado ang takna sa hapon niadtong miaging adlaw.

Ang namatay mao si Ronald Roca, 28, taga Poro, Camotes ug nagtrabaho isip helper sa usa ka cable company sa dakbayan sa Danao.

Matud pa ni PO1 Faron Avila sa Danao Police Station nga nahinabi sa Banat News nga misaka ang biktima sa atop sa usa ka panimalay aron unta pagtangtang sa usa ka cable connection nga wala na gamita.

Apan aksidente niining nahikapan ang live wire nga nagkutay sa ibabaw sa atop sa gisak-ang panimalay hinungdan sa pagkirig niini.

Tungod niini daling gitabang si Roca ug gidala sa Danao District Hospital apan patay na gyud kini.(/EIM)  (BANATNEWS)