CEBU, Philippines - Gumikan sa duha ka alom sa lapa-lapa sa walang tiil ug tuong tampihak sa magduha ka tuig nga batang lalaki, positibo kining giila sa iyang inahan nga basurera sulod sa Reception and Study Center for Children sa Department of Social Welfare and Development (DSWD)-7 kagahapon sa hapon.
Si Yuhelen Basilisco, 34, lumad nga taga barangay Suwa sa lungsod sa Argao kinsa kasamtangang magkatulganan sa merkado publiko sa lungsod sa Carmen midangop sa Tv5 ug ning tigbalita kagahapon sa buntag.
Sumala pa sa inahan nga dul-an na sa duha ka bulan nga nagpunay siya og pangita sa iyang 2-anyos nga anak lalaki nga si Roedel Basilisco human kini dagita sa usa ka lalaki nga wala hiilhi niadtong Marso 8 sa gabii samtang siya uban sa iyang kapuyong si Rumualdo ug kaubang basurero Pedro nangatulog atubangan sa usa ka pawnshop sa Poblacion lungsod sa Liloan sumala sa asoy sa usa ka security guard sa usa ka establisemento sa maong lungsod. Gani matud pa ni Yuhelen nga naabot siya sa dakbayan sa Bogo sa pagpinangita sa iyang anak.
Si Arnold Bustamante Reporter sa Tv5 ug DyHP uban ni Pasaporte mitabang ni Yuhelen pinaagi sa ilang paghatud niini ngadto kang Sr. Insp. Randy Caballes, hepe sa Research and Operation Branch sa Police Regional Office-7 human nila masayri nga adunay batang gibaligya og P500 sa miaging semana didto sa lungsod sa Compostela pinaagi sa ginganlan og Ricky.
Gumikan kay ang suspetsado dili tinuod nga amahan sa bata, gisikop kini sa kapolisan ug gibalhug sa prisohan. Ang bata gi-turn over sa kapolisan ngadto sa buhatan sa DSWD busa gisubay kini ni Bustamante ug Pasaporte.
Dayon gidala nila si Yuhelen ngadto sa buhatan sa DSWD ug dihang nakita sa inahan ang bata, gisil-ing dayon niini ang mga alom sa iyang wala nga lapa-lapa ug tuong tampihak nga nagpamatuod nga siyay inahan sa bata, busa gihatag sa taga DSWD ang maong bata ngadto kang Yuhelen nga gisaksihan nila ni Bustamante sa TV5 ug DYHP ug Pasaporte sa DYDD Bantay Radyo. - BANAT NEWS