2 ka pusher tiklo

CEBU, Philippines - Nasikop sa mga tinugyanan sa Philippne Drug Enforcement Agency (PDEA) ang duha ka notadong tigpayuhot og shabu ug uban pang matang sa gidiling drugas sa dakbayan sa Mandaue ug lungsod sa Cordova sa buy bust operation niini sa miaging gabii.

Ang mga suspetsado mao sila si Gerry Molito, 30, minyo nga taga Mandaue, ug si Geronimo Rapada, hingkod, nga taga barangay Buagsong, lungsod sa Cordova.

Si Molito nasakmitang og duha ka paketeng shabu, samtang si Rapada nasakmitan usab og usa ka 25 gramos nga paketeng shabu nga nagkantidad og P100, 000.

Matud pa ni Mark Maramba, PDEA agent nga ang maong mga dinakpan pulos notadong supplier og shabu   sa ilang tagsa-tagsa ka lugar   diin sila hidakpi sa mga otoridad.

Nagkagulkol na sila karon sa prisohan samtang gipasaka na ang tukmang kaso batok kanila ngadto sa korte. - BANAT NEWS