CEBU, Philippines - Andam nga mohatag og ganti ang kagamhanan sa dakbayan sa Lapulapu sa tawo o mga tawong naggiya sa kapolisan pagpatay sa giilang most wanted criminal kinsa usa usab ka notadong drug pusher sa maong dapit.
Kini tungod kay gikalipay ni Lapulapu City Mayor Paz Radaza ang maong hitabo nga giisip niyang usa ka mensahe ngadto sa mga nagpabilin sa maong bisyo sa pagpamaligya og illegal nga drugas sa dakbayan sa Lapulapu.
Gusto ni Radaza nga mapuo ang maong mga tawo kay mao kini ang naghatag og kahasol sa mga buotang tawo nga nagpuyo sa maong dakbayan.
Dungan sa pagpasalamat ni Radaza ngadto sa mga kapolisan ug sa mga tawong naggiya sa mga otoridad aron masayran ang nahimutangan sa namatay nga si Alex Oyao , gisabotsabotan karon sa konseho kun pilay kantidad sa ihatag nilang ganti sa informant.
Mahinumdoman nga pinaagi sa tip nga nadawat sa kapolisan, natultolan nila si Oyao didto sa usa ka tigbakayan sa sitio Ang-asil sa barangay Mactan sa miaging gabii aron unta isilbi ang warrant of arrest alang niini.
Apan imbis motahan nga malinawon, misibat kini ug namusil sa mga kapolisan hinungdan nga mibawos ang mga otoridad nga maoy nakaingon sa pagkamatay niya sa mga bala nga mitaroy sa iyang kalawasan. - BANAT NEWS