Dengue sa Lapulapu misaka

CEBU, Philippines - Misaka ang  kaso  sa  dengue sa dakbayan  sa Lapulapu  ning tuiga  kun  itandi  sa susamang  periodo sa miaging  tuig gikan  sa Enero  hangtud  Mayo.

Kini pinasubay   sa talaan sa Regional Epidemiology and Surveillance Unit (RSU) nga nagbutyag   nga  adunay 117 ka kasong dengue diin  duha  ang  nakalas kung itandi sa milabay’ng tuig 2011 nga mitala gihapon  og  117  ka  kaso  apan  usa  ra  ang  namatay.

Gumikan niini si Lapulapu City Mayor Paz Radaza mimando kang Lapulapu City Health officer Dr. Rodolfo Berame sa pagsusi sa maong taho ug sa paghimo og lakang sa pagsulbad niini.

Matud pa ni Radaza  nga gigahinan nila  og  dakong  kantidad ang departamento sa panglawas sa dakbayan sa Lapulapu aron mapakgang ang mga lamok nga maoy sinugdanan sa kasong dengue.

Lakip  nga  gipasusi ni Radaza mao ang mga materyales sa pagsumpo  sa dengue ilabi  na  sa mga   kahilitang  mga  dapit nga  may  daghang  tawo  nga  namuyo.

Gipahinumdom  ni  Radaza  nga  ang  buwan  sa  Hunyo ting-uwan, busa  labing  magmabinantayon  ang  katawhan pinaagi  sa pagpanghinlo sa  palibot. - BANAT NEWS