Naligsan sa 10-wheeler ulo nabuak

CEBU, Philippines - Namatay  ang  usa ka asawa human malatayi sa ligid sa 10-wheeler truck  samtang  naangol  usab  ang  iyang  bana human  sila  mapasok sa ilawom sa maong  sakyanan didto  sa  N. Bacalso, Avenue, barangay Linao, dakbayan sa Talisay sa miaging  Martes  sa  hapon.

Ang namatay  mao  si  Thelma  Lauronal, hingkod, samtang naangol  ang iyang bana  nga  si  Emerlito Alidon Lauronal, 46,  nga  pulos  nagpuyo  sa barangay Lantawan, lungsod sa San Fernando.

Si PO1 Mario Cartuciano sa traffic division nga sa kapolisan  sa dakbayan  sa Talisay mibutyag nga ang magtiayon nagsakay sa ilang motorsiklo paingon  sa San Fernando  gikan  sa dakbayan  sa Sugbo.

Pag-abot  nila  sa Linao   ang 10-wheeler truck  nga gimaneho ni Danilo Paragoso Villasencio, 41, taga barangay Bakay, dakbayan sa Toledo, mi-overtake  kanila apan  nabag-iran ang manobela sa  ilang  motor  hinungdan  nga  mibaliliw kini ngadto  sa katapad  usab nila nga  multicab nga  gimaneho  ni Nilo Gimongala Niral, 30, nga taga barangay  Sangat, San Fernando.

Pagbanda sa    maong  motorsiklo  sa multicab mibalik  kini  og baliwliw  ngadto  sa 10-wheeler  truck  diin didto  mapaslak  ang  mga  biktima  sa ilawom sa maong  sakyanan.

Matud pa  ni Inspector Ricardo Echavez, hepe  sa traffic division  nga si Emerlito maoy nakagawas gikan sa ilawom sa truck  apan si Thelma kinsa nadat-ogan sa motor wala makalingkawas ug napusa ang ulo niini ug nagupok ang lawas human malatayi sa tuong       bahin sa likod nga ligid sa truck.

Si Emerlito  gidala ngadto sa Talisay City District Hospital.

Si Villasencio  nagtingkagol karon  sa prisohan  sa  Talisay City Police Station ug mag-atubang sa kasong   reckless imprudence resulting to homicide, physical injuries ug damage to property. - BANAT NEWS