Level 2 drug pusher tiklo
CEBU, Philippines - Nasikop sa mga ahente sa Philippine Drug Enforcement Agency (PDEA)-7 ang usa ka level 2 drug pusher atol sa buybust operation didto sa barangay Buagsong sa lungsod sa Cordova sa miaging hapon.
Ang suspetsadong mikagulkol na karon sa prisohan mao si Geronimo Rapada, 44, biyudo nga nagpuyo sa maong lugar.
Ang maong suspek nasikop human itunol niini ngadto sa pusuer buyer nga ahente sa PDEA ang duha ka pakete nga gidudahang shabu nga gibayran og P500 nga marked money.
Si PDEA agent David Mark Maramba nga nahinabi sa mga tigbalita miingon nga human nila madakpi si Rapada, girikisa nila kini ug nakuhaan usab kini og laing usa ka dakong putos sa shabu nga mitimbang og 25 grams nga gibana-banang nagkantidad og P115 mil.
Una ilusad ang maong buybust operation gipanid-an sa kapolisan og duha ka semana ang kalihokan sa suspetsado.
Human masuta ang negosyo sa suspek sa pagpamaligya og shabu sa ilang lugar dihadiha milusad dayon ang kapolisan og buybust ug nagmalampuson kini.
Si Agent Jelou Paca mibutyag nga area ni Rapada ang tibuok lungsod sa Cordova ug dakbayan sa Mandaue diin mohalin kini og dili momenus 200 gramos nga shabu matag semana.
Gipasaka na sa kapolisan ang kaso batok sa suspetsado ngadto sa korte. (BANAT NEWS)
- Latest
- Trending
