Magtutudlo gibansay alang sa K+12

CEBU, Philippines - Sa tinguha nga labi pang moayo ang pagpatuman sa K+12 education program ang Department of Education (Dep-Ed) 7 mipahigayon og usa ka training alang sa mga magtutudlo bahin niining maong programa.

Sumala pa ni Danilo G. Gudelusao, Education Program Supervisor sa Dep-Ed 7 Cebu City Division sa pagpakighinabi sa Banat News nagkanayon nga ang tanang magtutudlo   gikan sa Grade 1 mahanas pag-ayo sa ilang trabaho ilabi na niining K+12 program. Gani matud pa niya nga nasugdan na ang K+12 program niadtong miaging tuig ug iyang nasuta nga maayo gayud ang dagan niini tungod kay misuporta man ang mga ginikanan bisan sa sinugdan may mga negatibong komento.

Hinuon midugang siya nga sa sinugdanan aduna silay nadawat nga mga negatibong reaksyon sa mga ginikanan sa tinun-an kay lagi makahatag gayud kini og dugang kahasol kanila ug sa mga bata ilabi na sa mga kabos apan ilang gipaningkamutan nga sila mapasabot pinaagi sa pagpasiugda og mga seminar sa bisan asang lugar aron ipasabot kanila ang K+12.

Si Gudelusao usab miingon nga aduna na silay nahitabong diskusyon ug training kauban ang mga nagkadaiyang stakeholders aron mas mapalambo pa ang maong programa.

Gikatakda nga karong umaabot nga pag-abli sa klase, pagasugdan na usab ang K+12 program sa Grade I ug Grade VII kung itandi niadtong miaging tuig nga kinder pa lamang ang napasiugdahan niini.

Sa pagkakaron napasiugda na ang ilang major training alang sa mga magtutudlo nga gipahigayon didto sa ECOTECH Center Lahug sa syudad sa Sugbo diin mikabat sa 450 pataas ang mga gibansay-bansay nga mga magtutudlo sa bag-ong kurikulom. (BANAT NEWS)