Mayor Canoy mihimakak sa pasangil sa kapitan

CEBU, Philippines -  Mihimakak si San Fernando Mayor Antonio Canoy kalabot sa pasangil ni Balud barangay Kapitan Reliso Enad kalabot nga adunay political colors ang pagkasikop kaniya uban sa iyang mga konsehal ug tanod.

Base sa pakighinabi sa Banat News ni Enad sa miaging adlaw, kini nagtuong may ‘political motivation’ ang pagpadakop kanila, human sila makatulog sa prisohan og usa ka gabii, gibuhian sila tungod sa giisyung release order sa korte kay nabasura man daan ang ilang kaso.

Gikwestyon ni Enad nganong nalutsan sila og warrant of arrest bisan paman og na-dismiss na ang ilang kaso niadtong buwan sa Abril.

Apan si Mayor Canoy sa iyang bahin mibutyag sa diha nga mitawag kini sa Banat News nga puros bakak ang gibutyag ni Enad.

“Di na tinuod day, mga bakak na tanan, pulos gyud na make up stories,” matud pa ni Canoy.

Matud pa ni Canoy nga kun namolitika pa siya dili na siya kinahanglang mosimpatiya sa katawhan tungod kay ang katawhan diha na niya mismo milaban pinaagi sa pagpili kaniya isip ilang mayor sa lungsod.

Midugang usab si Canoy nga wala usab kamatuoran ang alegasyon ni Enad nga adunay unom o lima ka barangay nga wala niya hatagi og budget.

Kini tungod kay iyang gihatagan ug gitabangan ang mga barangay lakip na ang mga kaalyado sa iyang kontra-partido kaniadto sa politika.

“ Pulos man na bakak iyang giingon, maski og kaatbang nako sa politika ako nang gitabangan tungod kay ako may gipili sa kadaghanan aron palambuon ang lungsod,” matud pa ni Canoy.

Dugang pa ni Canoy nga si Enad ang namolitika kini tungod sa ilang gihimo nga pagpakgang sa gitaod niini nga tubo nga miagi sa ilang barangay.

“I don’t need that kind of guy, sila maoy namolitika, mahadlok sila nga maadto nako ang ilang mga supporters,” pasabot pa ni Canoy.

Samtang si Enad kagahapon sa buntag gipangutana ning tigbalita kalabot sa ilang legal nga lakang batok sa ilang pagkasikop.

Apan igo lang kini mitubag pinaagi sa text “Yes of course but we have to study first or refer to my lawyer and the group as well.” (BANAT NEWS)