Bishop Du nanamilit sa taga Dumaguete
DUMAGUETE CITY, Philippines – Emosyonal nga nanamilt ang obispo sa Dumaguete sanglit molingkod na kini isip bag-ong Arsobispo sa Palo, Leyte ugmang adlawa.
Si outgoing Bishop John F. Du sa Dumaguete Diocese nagpasalamat niadtong Domingo sa iyang ginsakupan tungod sa ilang pagtabang sa pagpalambo sa diyosisis sa Dumaguete.
Gipaabot nga si Apostolic Nuncio to the Philippines, Archbishop Giuseppe Pinto, maoy pormal nga mopalingkod kaniya.
Ang kaparian, madre, lay ministers, religious organizations ug uban pang grupo ang gipaabot nga mohatud kang Du sa pagbiya niini ngadto sa Palo, Leyte.
Si Du padayong nanawagan sa mga taga Dumaguete nga magpabiling lig-on ang pagsuporta sa Dumaguete Diocese samtang siya moatubang sa mas dakong tahas sa Palo nga diin adunay 160 kaparian ang masakop kaniya komparar sa 80 ka pari sa 42 ka parokya sa Dumaguete.
Sa pamunoan ni Du sa Dumaguete nakapatukod kini og daghang mga programa sama sa pagpakaon sa mga kabus sa kadalanan. Ang maong proyekto gidumala na karon sa Franciscan Sisters of the Poor ug ubang support group.
- Latest
- Trending
