CEBU, Philippines - Ang Technical Education and Skills Development Authority (TESDA) nangusog sa pagpatuman sa ilang programa sa mga bukirang lugar nga gitumong sa paghatag sa mga Filipino og igong kaalam aron mahimong takus nga empleyado.
Gipalapdan sa TESDA ang ilang serbisyo sa Metro Cebu ug kasilinganang bahin sa Negros Oriental pinaagi sa pagpasiugda og TESDA Park and Train Mobile Vans nga maoy mopahigayon og skills training sa mga taga bukid nga layo sa training center sa TESDA .
Gilusad ni TESDA Director General Joel Villanueva ang walo ka TESDA Park ug Train Mobile Vans didto sa University of Cebu-Mambaling Campus atol sa ilang pagsaulog sa TESDA Trainees Day sa miaging semana.
Matud pa niya nga ang gilantaw sa TESDA mao ang paghatag og skills certificate sa matag Filipino lakip na ang taga bukid aron mapalambo ang ilang panginabuhi.
Samtang ang TESDA Accredited and Tie-up Educational and Technical Institutions mohatag usab og skills training ubos sa Park and Train Mobile Vans sama sa University of Cebu, Cebu Science of Welding Skills and Technology Incorporated (CSWTI), Center for Health Care Professions (CITP), MGB Skills Development and Assessment Center, St James Academy of Skills Technology, Incorporated ug Benedicto College Incorporated.
Ang mga gitanyag nga skills training naglakip sa commercial cooking, housekeeping services, bartending, food and beverage services, front office services, food processing, bread and pastry production, 2D animation, computer programming ug welding arts. (BANAT NEWS)