2nd district tungaon

CEBU, Philippines - Gilauman ni 2nd district representative Pablo Garcia nga hingpit nang mahimong balaod ang iyang bill nga giduso alang sa pagtunga sa second district sa lalawigan sa Sugbo sa dili pa ang piniliay sa sunod tuig.

 Kini human ikapasar sa ubos balay balauranan ang House Bill 3865 nga nagpikas sa segundo distrito nga may 15 ka mga lungsod nga gilangkoban sa mga lungsod sa Argao, Dalaguete, Alcoy, Boljoon, Oslob, Santander, Samboan, Ginatilan, Malabuyoc, Alegria, Badian, Moalboal, Alcantara, Ronda ug Dumanjug.

Matud pa ni Garcia nga ang maong balaodnon anaa na karon sa senado ug posibling mahimo kining balaod sa dili pa ang election sa sunod tuig.

Hinuon giklaro ni Garcia nga kun madugay ang paghuman sa pagdungog sa senado sa impeachment case ni Chief Justice Renato Corona hayan malangay ang pagpasar sa senado sa maong balaodnon.

Apan iyang gitataw nga may igo pang panahon ang senado sa paglig-on sa maong balaodnon aron mahimo kining balaod sa sunod tuig

Sa nasayran kung matunga na unya ang 2nd district, ang mga lungsod gikan sa Argao hangtud sa Samboan magpabilin sa second district samtang ang mga lungsod gikan sa Ginatilan ngadto sa Dumanjug maoy maglangkob sa bag-o ug ikapitong distrito.  (BANAT NEWS)